О священстве

Молитвы о духовном отце
Молитвы о церковном священноначалии



Молитвы о духовном отце

Молитва 1-я, Спасителю о духовном отце

О Сладча́йший Иису́се! Ты́ безме́рно свя́т, безме́рно пра́веден, безме́рно милосе́рд, освяти́ Твое́ю святы́нею отца́ моего́ духо́внаго, оправда́й его́ Свое́ю пра́ведностию, покры́й Твои́м милосе́рдием, исцели́ его́ от боле́зней.
Го́споди, Ты́ соедини́л на́с на земли́, не разлучи́ на́с и в Небе́сном Твое́м Ца́рствии и святы́ми его́ моли́твами прости́ вся́ моя́ согреше́ния, прости́ и все́х его́ духо́вных ча́д, я́ко Бла́г и Человеколю́бец. Ами́нь.[1]

Молитва 2-я, ко Господу о духовном отце

Спаси́, Го́споди, и поми́луй отца́ моего́ духо́внаго (и́мя), да́руй ему́ душе́вное спасе́ние и теле́сное здра́вие, огради́ моли́твами святы́х а́нгел, отгони́ вся́каго, ча́ющаго ему́ зла́.
Го́споди, не осуди́, не истяжи́ в не́м дарова́ния духо́вныя, откро́й ему́, Го́споди, вся́ моя́ прегреше́ния, испо́лни его́ му́дростию, моли́твою и любо́вию. Ра́ди святы́х его́ моли́тв, да́руй мои́м грехо́м проще́ние, жи́зни исправле́ние, в доброде́телях преуспе́яние; ниспосли́ ему́ ми́лости Твоя́ бога́тыя.
Сподо́би его́, Го́споди, в де́нь се́й (но́щь сию́) без греха́ сохрани́тися, побори́ его́ враги́ плотски́я и безпло́тныя, и от ви́димых и неви́димых вра́г изба́ви его́, изми́ его́ от челове́ка льсти́ва и от му́жа непра́ведна, соблюди́ па́ству его́ до кончи́ны его́ издыха́ния, что́бы в покая́нии на́м приити́ к ти́хой и безмяте́жной жи́зни.
Го́споди, помяни́, посети́, укрепи́ и сохрани́ его́ на мно́гие ле́та.[2]

Молитва 3-я, ко Пресвятой Богородице о духовном отце

О, Пресвята́я Влады́чице моя́, Де́во Богоро́дице, Цари́ца Небесе́ и земли́, вонми́ вопию́щей души́ мое́й и приими́ гре́шную мольбу́ мою́, Пречи́стая Ма́терь Бо́жия, за отца́ моего́ духо́внаго, скорбя́щаго раба́ Твоего́ (и́мя).
Бу́ди ему́ всегда́ спу́тницей и на вся́кое вре́мя сопровождай и огражда́й его́ святы́ми А́нгелами. Укрепля́й его́ бо́дрствующаго, оберега́й его́ спя́щаго, утеша́й его́ плачущаго, ободряй его́ уныва́ющаго, избавля́й от скорбе́й, свобожда́й от клеветы́, воздвиза́й немощна́го, побежда́й вою́ющих проти́в него́ бесо́в, и в сме́ртной опа́сности помога́й ему́. Ежедневно явля́й его́ стра́шным для ви́димых и неви́димых враго́в, что́бы они́ зна́ли, что́ о́н ра́б Тво́й, Богома́терь, роди́вшая Бо́га и Царя́, Кото́рому подоба́ет че́сть и поклоне́ние во ве́ки веко́в.
Ма́терь Бо́жия, умягчи́ се́рдца злы́х челове́к, возстаю́щих на него́. Ты́ ви́диши труды́ и ско́рби отца́ моего́, его́ ско́рби Тебе́ еди́ной изве́стны. Ты́ ве́даеши все́ та́йны души́ его́, воззри́ ми́лостиво на него́ с небеси́, облегчи́ его́ страда́ния, покры́й его́ покро́вом Свои́м, посети́ его́ Свое́ю небе́сною ми́лостию, посли́ благослове́ние на дела́ его́ и да́й ему́ неви́димую по́мощь. И святы́ми его́ моли́твами да́й мне́ смире́ние, самоукоре́ние, терпе́ние, кро́тость, целому́дрие, молча́ние и покры́й меня́ от все́х напа́стей и враго́в ви́димых и неви́димых. Ами́нь.[2]

Молитва 4-я, преподобного Симеона Нового Богослова об обретении духовного наставника
Го́споди, не хотя́й сме́рти гре́шника, но е́же обрати́тися и жи́ву бы́ти ему́, соше́дый на сие́ на зе́млю, да лежа́щия и умерщвле́нныя грехо́м воздви́гнеши и ви́дети Тебе́, свет и́стинный, я́коже челове́ку возмо́жно ви́дети, сподо́биши их, посли́ ми челове́ка, ве́дущаго Тебе́, да, я́коже Тебе́, порабо́тав ему́ и все́ю си́лою мое́ю подчини́вся ему́, и Твою́ в того́ во́ли сотво́рь во́лю, благоугожду́ Тебе́, еди́ному Бо́гу и сподо́блюся и аз, гре́шный, ца́рствия Твоего́.

Молитвы о церковном священноначалии

Молитва ко Господу

Архиере́ю ве́чный, Христе́ Бо́же на́ш, приле́жно Ти́ молю́ся: Твои́м вы́шним благослове́нием Святе́йшаго Патриа́рха со архиере́и на́ши правосла́вныя благослови́, утверди́, укрепи́, ми́ром огради́ и святе́й Твое́й Це́ркви це́лых, здра́вых, честны́х, долгоде́нствующих и пра́во пра́вящих сло́во Твоея́ и́стины да́руй; от все́х же сопроти́вных, ви́димых и неви́димых враго́в ми́лостиво изба́ви. Ами́нь.

Владыка вечный, Христос Бог наш, я усердно молюсь Тебе: Твоим высшим благословением Святейшего Патриарха и наших православных архиереев благослови, утверди, укрепи, миром огради и Святой Твоей Церкви [их] целыми, здоровыми, почтенными, долгоденствующими и правильно толкующими слово Твоей истины даруй; от всех же враждебных, видимых и невидимых врагов милостиво избавь. Аминь.

Первоверховному апостолу Петру

О, святы́й Пе́тре, вели́кий апо́столе, самови́дче и сотаи́нниче Бо́жий, всемо́щною десни́цею Учи́теля твоего́ из вод волну́ющихся прия́тый и от коне́чнаго потопле́ния свободи́выйся! Не забу́ди и нас убо́гих (имена), в ти́не грехо́вней погря́зших и волна́ми жите́йскаго мо́ря обурева́емых: пода́ждь нам твою́ ру́ку кре́пкую, помози́ нам и удержи́ нас от потопле́ния во страсте́х, похоте́х, лжах и клевета́х. Сотвори́ и ты с на́ми ми́лость, тебе́ от Го́спода явле́нную, да не в сомне́нии и малове́рии изги́бнем. Научи́ нас, учи́телю наш, пролива́ти сле́зы покая́ния, да пла́чем го́рько о дея́ниих на́ших в ве́це сем. И а́ще твоя́ сле́зы, в покая́ние излия́нныя, ми́лостию Свое́ю покры́ Госпо́дь и Учи́тель твой, испроси́ и нам, со дерзнове́нием апо́стольским, проще́ния во гресе́ ежеча́снаго. Да ти́хое и безмо́лвное житие́ поживе́м в ве́це сем до часа́, в о́ньже и́мать призва́ти нас Влады́ка Госпо́дь, наш Судия́ нелицеприя́тный. Ты же, о всехва́льный апо́столе, не отве́ржи во́пля на́шего и стена́ния к тебе́, но заступи́ нас пред Христо́м, твои́м Учи́телем, да непреста́нно сла́вим Его́ милосе́рдие к нам, со Отце́м и Святы́м Ду́хом, во ве́ки веко́в. Ами́нь.

Святому Апостолу Павлу

О, святы́й верхо́вный апо́столе Па́вле, сосу́де и́збранный Христо́в, небе́сных та́ин сказа́телю, всех язы́ков учи́телю, церко́вная трубо́, преслову́щий ви́тие, мно́гия бе́ды за и́мя Христо́во претерпе́вый, мо́ре изме́ривый и зе́млю обше́дый и нас от ле́сти и́дольския обрати́вый! Тя молю́ и к тебе́ вопию́: не гнуша́йся мене́ скве́рнаго (имя), возста́ви па́дшаго грехо́вною ле́ностию, я́коже в Ли́стрех храма́го от чре́ва ма́терня возста́вил еси́; и я́коже Евти́ха ме́ртва бы́вша оживи́л еси́, воскреси́ и мене́ от ме́ртвых дел; и я́коже моли́твою твое́ю основа́ние темни́цы не́когда потря́сл еси́ и у́зники разреши́л еси́, си́це исто́ргни мя твори́ти во́лю Бо́жию. Вся бо мо́жеши да́нною ти вла́стию от Христа́ Бога, Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м, и со Пресвяты́м и Благи́м и Животворя́щим Его́ ду́хом, ны́не и при́сно и во ве́ки веко́в. Ами́нь.

Святителю Николаю Чудотворцу

О, до́брый наш па́стырю и богому́дрый наста́вниче, святи́телю Христо́в Нико́лае! Услы́ши нас гре́шных (имена), моля́щихся тебе́ и призыва́ющих в по́мощь ско́рое предста́тельство твое́; виждь нас не́мощных, отвсю́ду уловля́емых, вся́каго бла́га лише́нных и умо́м от малоду́шия помраче́нных. Потщи́ся, уго́дниче Бо́жий, не оста́вити нас в грехо́внем плену́ бы́ти, да не бу́дем в ра́дость враго́м на́шим и не у́мрем в лука́вых дея́ниих на́ших. Моли́ о нас недосто́йных Соде́теля на́шего и Влады́ку, Ему́ же ты со безпло́тными ли́ки предстои́ши: ми́лостива к нам сотвори́ Бо́га на́шего в ны́нешнем житии́ и в бу́дущем ве́це, да не возда́ст нам по дело́м на́шим и по нечистоте́ серде́ц на́ших, но по свое́й бла́гости возда́ст нам. На твое́ бо хода́тайство упова́юще, твои́м предста́тельством хва́лимся, твое́ заступле́ние на по́мощь призыва́ем, и ко пресвято́му о́бразу твоему́ припа́дающе, по́мощи про́сим: изба́ви нас, уго́дниче Христо́в, от зол находя́щих на нас, да ра́ди святы́х твои́х моли́тв не обы́мет нас напасть и не погря́знем в пучи́не грехо́вней и в ти́не страсте́й на́ших. Моли́, святи́телю Христо́в Нико́лае, Христа́ Бо́га на́шего, да пода́ст нам ми́рное житие́ и оставле́ние грехо́в, душа́м же на́шим спасе́ние и ве́лию ми́лость, ны́не и при́сно и во ве́ки веко́в.