Кондак 1
Избранный угодниче Божий, пресветлый пустыни светильниче, и богомудрый монахов наставниче, преподобне отче наш Арсение! Со ангелы предстояй триипостасному Богу, и стяжавый к нему дерзновение многое, молися выну о спасении нас грешных, и молитвами твоими от всяких бед свобождай зовущих ти:
Радуйся, Арсение великий пустынножителю.
Икос 1
Ангела во плоти и человека небеснаго вемы тя, преподобне отче Арсение. Ты бо чистотою и святостию жития твоего, безплотным силам поревновал еси, и земнородных удивил еси, являя всем дивный образ в себе совершенства духовнаго. Темже восхваляем тя и глаголем:
Радуйся, ветхаго Рима святое прозябение:
радуйся, родителей благочестивых пречестная отрасль.
Радуйся, от младости на подвиги духовныя предъизбранный:
радуйся, от юности единаго Бога всем сердцем возлюбивый.
Радуйся, премудрости земной добре обученный:
радуйся, премудростию небесною одаренный.
Радуйся, закон Христов на скрижалехъ сердца твоего начертавый:
радуйся, во всех оправданиих господних непорочно ходивый.
Радуйся, страхом Божиим огражденный:
радуйся, ритор и богослов изрядный бывый.
Радуйся, целомудрие души и тела невредимо сохранивый:
радуйся, свято и богоугодно на земли поживый.
Радуйся, Арсение великий пустынножителю.
Кондак 2
Видев сердцеведец Господь, непорочную чистоту души твоея, отче Арсение, во диакона святыя римския церкве тя постави, да служиши пречистым и животворящим Христовым тайнам, и, яко достойный сосуд Божией благодати, возносиши молитвы соборныя за вся люди, воспевая Пресвятей Троице: Аллилуия.
Икос 2
Разума Божественнаго преисполнен был еси, Арсение богомудре, яко не быти равному тебе в премудрости и благочестии во всем царствии Римстем. Темже царь Феодосий в наставника сыновом своим Аркадию и Онорию тя избра, сим подвизая и нас звати тебе:
Радуйся, от запада к востоку пришедый светити людем богомудрием твоим:
радуйся, от ветхаго Рима в новый Рим преселивыйся на новыя подвиги духовныя.
Радуйся, царей наставниче и учителю:
радуйся, владык земных к Царствию Горнему руководителю.
Радуйся, при дворе царстем подвижничеству о Христе прилежавый:
радуйся, дни на учение, нощи же на молитву посвящавый.
Радуйся, от царя Феодосия зело любим и почитаем бывый:
радуйся, отцем царя и сыновей его нареченный.
Радуйся, саном сенаторским почтенный:
радуйся, во славе царствия земнаго смирения святаго преисполенный.
Радуйся, молитвы усердныя к Богу возсылавый:
радуйся, коленопреклонения многия совершавый.
Радуйся, Арсение, великий пустынножителю.
Кондак 3
Силою Божиею укреплен, отче преподобне, возжелал еси в безмолвии пустыннем работати Господеви, вину же восприем гнев на тя царевича Аркадия, умыслил еси тайно оставити двор царский, и скрытися в пустыни, да невозбранно возможеши воспевати Богу серафимскую песнь: Аллилуия.
Икос 3
Имея желание велие спасти душу твою, отче Арсение, молился еси Богу, да укажет тебе путь правый ко спаcению, и услышал еси глас небесный, глаголющь тебе: «Арсение, бегай от человеков, и спасешися!» Темже от двора царскаго тайно изшел еси, в худыя ризы облеченный, и в пустыню скитскую пришел еси, прося отцев пустынных, да сотворят тя иноком. О сем тя славяще зовем:
Радуйся, от Самого Господа тайно наученный подвижничеству духовному:
радуйся, гласом небесным наставленный безмолвствовати душеспасительно.
Радуйся, дом царский оставивый, да Царствие Горнее унаследиши:
радуйся, всю славу мира сего презревый, да славу вечную небесную получиши.
Радуйся, един единому Христу в пустыни работати возжелавый:
радуйся, святый ангельский образ усердно себе просивый.
Радуйся, от великаго Иоанна Колова во смирении дивно искушенный:
радуйся, смирение нелицемерное во искушении том показавый.
Радуйся, пострижение во иночество от рук его святых восприявый:
радуйся, от него предъуведенный, яко инок благоискусен будеши.
Радуйся, в безмолвии пустыннем добре подвизавыйся:
радуйся, в посте и молитвах неослабно пребывавый.
Радуйся, Арсение, великий пустынножителю.
Кондак 4
Бури страстей избежав, отче Арсение, в пристань благодатнаго безстрастия достигл еси, и в пустыне скитстей равноангельно пожил еси, Богом наставляемь к безмолвию совершенному, дивным житием твоим удивлял еси вся отцы пустынныя, и подвизал еси их славити Бога и пети ему: Аллилуия.
Икос 4
Слышав паки глас небесный: «Арсение, бежи от человек и в молчании буди: ибо сие есть корень безгрешия», – в пустыню глубочайшую удалился еси, преподобне, и молчанием уста твоя заключил еси, избегая бесед человечестких, да выну беседуеши с Богом в сердце твоем. Сего ради и мы вопием к тебе:
Радуйся, высото безмолвия, удобовосходимая точию избранными из избранных:
радуйся, глубино смирения, удостоенная благоволения Божия.
Радуйся, прозорливче дивный, древним пророком уподобивыйся:
радуйся, дара предведения преисполненный.
Радуйся, бегавый от людей, да не разлучишися с Богом:
радуйся, молчавый устами, да не престанеши вопия ко Господу в сердце твоем.
Радуйся, истинный Христов угодниче, вся заповеди Его верно совершивый:
радуйся, о Христе вся ближния твоя искренно любивый.
Радуйся, правило иноческаго безмолвнаго жития:
радуйся, образе совершенства духовнаго.
Радуйся, о нем же удивишася ангели:
радуйся, о нем же Бога славят человецы.
Радуйся, Арсение, великий пустынножителю.
Кондак 5
Богоприятный источник слез молитвенных, очи твои источаху, преподобне отче, и толико умиления божественнаго преисполнен был еси, яко плакати тебе выну при молитвах твоих. Темже и нас поучаеши примером твоим со слезами молитися Богу, и пети Ему во умилении сердечнем: Аллилуия.
Икос 5
Виден был еси весь огнезрачен, на молитве предстоя, серафимскою любовию ко Господу объятый, и богомыслием высоким от земли к небесным возносимый, отче Арсение. Дивящеся убо сему начатку славы твоея, ублажаем тя благохвалении сими:
Радуйся, пустыни скитския духовное украшение:
радуйся, Египта славо и похвало.
Радуйся, державо безмолвия:
радуйся, мира Христова обитель.
Радуйся, слез источниче неоскудный:
радуйся, молитв благоухающее кадило.
Радуйся, псалмопения органе прекрасный:
радуйся, терпения столпе непоколебимый.
Радуйся, праздность душевредную возненавидевый:
радуйся, руками твоима кошницы сплетавый.
Радуйся, молитвою непрестанною с Богом выну беседовавый:
радуйся, видения небесныя тайно созерцавый.
Радуйся, Арсение, великий пустынножителю.
Кондак 6
Проповедник был еси душеспасительный, отче Арсение, всем к тебе приходившим, молчанием твоим поучавый паче риторскаго благословения вся верныя, видевшыя в тебе совершеннаго о Христе подвижника, сильнаго пред Богом и людьми, егоже лице, яко лице ангела Божия, светом небесным сияше. Темже и вопияху прославльшему тя Богу: Аллилуия.
Икос 6
Возсияв великими добродетельми твоими в пустыни скитстей, яко солнце пресветлое, отче Арсение, весь мир озарил еси славою твоих подвигов, и твоего безмолвнаго жития, иже во образ всем безмолником от Бога дадеся, и в правило известное ко спасению. Темже присно тя славяще вопием:
Радуйся, заповедей Христовых верный исполнителю:
радуйся, примером твоим богомудрию совершенному люди научивый.
Радуйся, ангельское житие на земли показавый:
радуйся, святую Христову церковь подвигами твоими благоукрасивый.
Радуйся, возшедый на верх добродетелей христианских:
радуйся, нисшедый во глубину смирения святаго.
Радуйся, добрый делателю винограда небеснаго:
радуйся, сладкия плоды Христу принесый.
Радуйся, разсуждение духовное стяжавый:
радуйся, богомыслие молитвенное возлюбивый.
Радуйся, пустыннолюбивая горлице, предтече подобящаяся:
радуйся, сосуде Господень, Дарами Святаго Духа преисполненный.
Радуйся, Арсение, великий пустынножителю.
Кондак 7
Хотя Господь явити отцем пустынным твоего, отче Арсение, безмолвнаго жития совершенство, показа единому от них в видении, како корабль твой в велицем безмолвии не человеки и не ангелы, а Самим Господом управляется: и тако всем ведомо сотворися, яко бегая от человеков с Богом соединился еси, зовый Ему: Аллилуия.
Икос 7
Ново и дивно бысть житие твое, преподобне отче, в молчании и безмолвии крайнем проводимое тобою в пустыни скитстей: дивны бяху и бдения твоя всенощныя, в нихже, воздев горе руце твои на заходе солнца, стоял еси тако моляся, дондеже солнце восхождаше. О сем удивляющеся, вопием ти сице:
Радуйся, преподобне, пустыню безплодную духовно оплодотворивый:
радуйся, богоносе, от Египта добродетельми твоими всему миру возсиявый.
Радуйся, отче, отцев красото:
радуйся, пустынножителей богомудрая доброто.
Радуйся, нищеты рачителю:
радуйся, ангелов собеседниче.
Радуйся, видений божественных тайнозрителю:
радуйся, яко тебе безвестная и тайная Бог явил есть.
Радуйся, яко тобою мнози ко спасению наставлени быша:
радуйся, яко тобою заблуждающиися путь правый обретоша.
Радуйся, светилниче, сияющий богомудрия лучами:
радуйся, реко многоводная учения божественнаго.
Радуйся, Арсение, великий пустынножителю.
Кондак 8
Странническое на земли житие возлюбил еси, отче Арсение, не имый зде пребывающаго града, но грядущаго, Иерусалима небеснаго, выну взыскуяй, преходил еси от места на место в пустыни скита египетскаго, и тако, яко безплотный, нищетно и безмолвно пребывал еси, взывая ко Господу: Аллилуия.
Икос 8
Весь ум свой в Бозе углублен имел еси, Арсение отче наш, и толико богомыслию непрестанному прилежал еси, яко многажды забывати тебе о пищи и питии. Научи убо и нас ленивых и нерадивых бодрствовати в молитвах к Богу, да тебе благодарственно зовем:
Радуйся, освященный сосуде Божия благодати:
радуйся, сокровище пребогатое добродетелей.
Радуйся, яко час смертный присно поминал еси:
радуйся, яко дне суднаго в забвении не положил еси.
Радуйся, яко рыдал еси горце воспоминая мучения вечная:
радуйся, яко плакал еси во вся дни живота твоего, да избегнеши геенскаго пламене.
Радуйся, смирением совершенным низложивый вся искушения прегордаго велиара:
радуйся, неуязвим пребывавый его разжженными стрелами.
Радуйся, руце твои преподобныя со дерзновением горе воздевавый:
радуйся, от захода до восхода солнечнаго в молитвах Господеви предстоявый.
Радуйся, преисполненный божественныя любве:
радуйся, болий в лике преподобных.
Радуйся, Арсение, великий пустынножителю.
Кондак 9
Вся заповеди Христовы верно исполнил еси, преподобне отче, и толико Богу угодил еси, яко дарова великий дар рассуждения духовом и познания помыслов человеческих, учеником же твоим глаголал еси, яко множицею о глаголе, егоже провещал еси, каялся еси, а о молчании никогдаже, сим поучая их избегати празднословия душевреднаго, да возмогут благоприятно пети создателю своему: Аллилуия.
Икос 9
Витий многовещанных превосходил еси даром слова, преподобне, молчанием же твоим паче слова поучал еси вся приходившыя к тебе пользы ради душевныя, наставляя их хранити уста от многословия и осуждения ближних, еже и нас сподоби улучити молитвами твоими, да зовем ти:
Радуйся, земный ангеле и небесный человече:
радуйся, верный последователю Христов.
Радуйся, положивый хранение устом твоим:
радуйся, молчаливый подражателю совершенств Иисусовых.
Радуйся, молчанием твоим ближних твоих поучавый:
радуйся, высотою добродетелей твоих человеки удивлявый.
Радуйся, нищету духовную стяжавый:
радуйся, кроткое и незлобивое сердце имевый.
Радуйся, всякое угождение плоти возненавидевый:
радуйся, пустынное озлобление сладце претерпевый.
Радуйся, гнилую воду яко ароматы обонявый:
радуйся, вместо мягкаго одра, рогозину себе постилавый.
Радуйся, Арсение, великий пустынножителю.
Кондак 10
Спасения душевное стяжал еси вся дни живота твоего, преподобне отче, и сие благонадежно получил еси, в старости маститей кончиною святою преставился еси ко Господу, прияти от него мзду трудом твоим на небеси, на земли же оставил еси память с похвалами житием твоим благим, еже восхваляя, поем Богу, дивному во святых своих: Аллилуия.
Икос 10
Стена ограждения явился еси верным, отче Арсение, по честнем успении твоем, соблюдаяй их молитвами твоими от всяких искушений и озлоблений диавольских: приял бо еси благодать от Господа помогати земнородным, молитвенно тя призывающим:
Радуйся, победоносче, увенчанный от Христовой десницы:
радуйся, украшенный славою невечернею на небеси.
Радуйся, ублажаемый от рода в род на земли:
радуйся, радостный совсельниче ангелов.
Радуйся, блаженный сонаследниче всех святых:
радуйся, в лоне Авраамли упокоенный.
Радуйся, со избранными Божиими водворенный:
радуйся, лицезрения Христова сподобленный.
Радуйся, приявый блага, праведным от века уготованныя:
радуйся, получивый гражданство Иерусалима горняго.
Радуйся, вселивыйся, тамо, отнюдуже отбеже всяка болезнь:
радуйся, осиянный светом трисолнечнаго Божества.
Радуйся, Арсение, великий пустынножителю.
Кондак 11
Пение со ангельскими воинствы приносиши горе Пресвятей Троицы, Арсение богоблаженне, и молишися выну за люди, верно почитающыя святую память твою. Молим тя, преподобне: помолися и за нас грешных ко Господу, славящих днесь имя твое и ублажающих подвиги твоя: да будем и мы подражатели добродетелем твоим, и вкупе с тобою сподобимся пети Триединому Богу: Аллилуия.
Икос 11
Светоподательный светильник добродетелей евангельских был еси при жизни, отче Арсение, таковым являешися и по смерти, наставляя нас к богоугождению истинному душеспасительными изречениями твоими, в книгах святоотеческих записанными, от нихже почерпая назидание духовное, взываем ти:
Радуйся, зерцало чистое сокровеннаго в Бозе жития:
радуйся, свеще, горящая пламенем любве ко Господу.
Радуйся, совершенный о Христе подвижниче:
радуйся, добрый иноков наставниче.
Радуйся, Евангелия Христова последователю:
радуйся, апостольских преданий блюстителю.
Радуйся, богомудрия небеснаго преисполненный:
радуйся, богомыслием молитвенным удобренный.
Радуйся, уме, озаренный лучами божественнаго света:
радуйся, связавый язык свой молчанием во славу Божию.
Радуйся, в молчании твоем благоглаголивый учитель бывый:
радуйся, ученики твоя богоугождению истинному научивый
Радуйся, Арсение, великий пустынножителю.
Кондак 12
Благодать Господню испроси нам, преподобне угодниче Христов, и буди нам руководитель в Царствие Небесное. Молимтися прилежно: помози нам немощным и грешным, твоим добродетелем подражати, Богу, а не миру благоугождати, да возможем благоприятно пети всех Творцу: Аллилуия.
Икос 12
Поюще святое безмолвное житие твое, отче Арсение, дивимся богомыслию твоему молитвенному, яко выну с Богом пребывал еси умом твоим, ныне же, егда прешел еси от временных подвигов к вечному блаженству, тем паче с Богом неразлучно пребываеши, и Бог в тебе пребывает, егоже умоляти не престай за чтущыя тя и вопиющыя:
Радуйся, крине святости и чистоты:
радуйся, древо благоплодное сада Иисусова.
Радуйся, возрасший в удолиях святаго смирения:
радуйся, вознесенный даже до горы небесныя.
Радуйся, вышняго Сиона жителю:
радуйся, славы тройческия созерцателю.
Радуйся, всех святых присный друже:
радуйся, грешных с Богом примирителю.
Радуйся, подвижническаго безмолвнаго жития верный указателю:
радуйся, о всех чтущых тя усердный ко Господу предстателю.
Радуйся, душы наша наставляяй во спасение:
радуйся, телеса нашя в подвизех укрепляяй.
Радуйся, Арсение, великий пустынножителю.
Кондак 13
О, великий угодниче Божий, преподобне отче наш Арсение! Приими благоутробно сие малое моление наше в похвалу тебе приносимое с верою и любовию, и умоли возлюбленнаго тобою и возлюбившаго тя Господа: да спасет и помилует нас грешных, избавит муки вечныя, и сподобит во Царствии Небеснем со святыми пети ему: Аллилуия.
Икос 1
Ангела во плоти и человека небеснаго вемы тя, преподобне отче Арсение. Ты бо чистотою и святостию жития твоего, безплотным силам поревновал еси, и земнородных удивил еси, являя всем дивный образ в себе совершенства духовнаго. Темже восхваляем тя и глаголем:
Радуйся, ветхаго Рима святое прозябение:
радуйся, родителей благочестивых пречестная отрасль.
Радуйся, от младости на подвиги духовныя предъизбранный:
радуйся, от юности единаго Бога всем сердцем возлюбивый.
Радуйся, премудрости земной добре обученный:
радуйся, премудростию небесною одаренный.
Радуйся, закон Христов на скрижалехъ сердца твоего начертавый:
радуйся, во всех оправданиих господних непорочно ходивый.
Радуйся, страхом Божиим огражденный:
радуйся, ритор и богослов изрядный бывый.
Радуйся, целомудрие души и тела невредимо сохранивый:
радуйся, свято и богоугодно на земли поживый.
Радуйся, Арсение великий пустынножителю.
Кондак 1
Избранный угодниче Божий, пресветлый пустыни светильниче, и богомудрый монахов наставниче, преподобне отче наш Арсение! Со ангелы предстояй триипостасному Богу, и стяжавый к нему дерзновение многое, молися выну о спасении нас грешных, и молитвами твоими от всяких бед свобождай зовущих ти:
Радуйся, Арсение великий пустынножителю.
Молитва
О, священная главо, земный ангеле, небесный человече, безмолвия рачителю, молчания любителю, преподобне и богоносне отче наш Арсение! Припадаем ти и молимся: помолися ко Господу, Богу и Спасу нашему Иисусу Христу, да дарует нам грешным и недостойным рабом своим, вся ко спасению душевному благопотребныя дары своя: веру праву, надежду благу, любовь нелицемерну, благочестие непоколебимое, любомудрие христопоследовательное, и вся добродетели, во святем Евангелии Им заповеданныя: да будем подражатели твоего богоугоднаго жития, и вкупе с тобою сподобимся спасение вечное получити и Царствие Небесное унаследити. Ей, угодниче Божий! Не презри нас, но помози нам, небесным предстательством твоим, благочестно житие временное скончати, кончину благую, мирную и непостыдную стяжати, и блаженства райскаго удостоитися: да прославим человеколюбие и щедроты в Троице славимаго и покланяемаго Бога, Отца и Сына и Святаго Духа, и твое святое заступление, во веки веков. Аминь.
