Кондак 1
Взбраннаго Воеводы добльственнии воини, Царю Небесному добре послужившии и веру даже до смерти сохраншии, преподобномученицы обители Мгарския, восхваляем вас, любовию зовуще:
Радуйтеся, страстотерпцы преподобнии, Церкве Православныя светлое украшение.
Икос 1
Ангельскаго жития возжелавше, преподобнии, вся красная мира презрели есте, и яко мученицы к горним возшли есте. Темже слышите от нас похваления сицевая:
Радуйтеся, мирских благ вседушевно отрекшиеся; радуйтеся, к небесным любовию Христовой привлекшиеся.
Радуйтеся, горняго мира граждане достопохваляемии; радуйтеся, от всех родов христианских ублажаемии.
Радуйтеся, обетования Христовы во уме присно имевшии; радуйтеся, крилами мучений ко Христу возлетевшии.
Радуйтеся, страстотерпцы преподобнии, Церкве Православныя светлое украшение.
Кондак 2
Видяще гонения безбожных на Церковь святую, Амвросий премудрый игумен никакоже убояся, обаче в радости подвизаше братию пети Богови усердно: Аллилуиа.
Икос 2
Разум богопросвещенный имуще, во смирении на закланию текоша иноцы, яко агнцы, подражающе Агнцу, закланному за весь мир. Сего ради блажими суть сице:
Радуйтеся, радостно претерпевшии поругания; радуйтеся, Церкве изрядное благоухание.
Радуйтеся, смиренно приявшии поношения; радуйтеся, обители Мгарския Богу приятное приношение.
Радуйтеся, кротце за убивающих молившиися; радуйтеся, радости небесныя в подвизе причастившиися.
Радуйтеся, страстотерпцы преподобнии, Церкве Православныя светлое украшение.
Кондак 3
Сила Вышняго укрепи преподобных во страдании, во еже не убоятися прещений, ниже смерти, токмо в радости пети Подвигоположнику Христу Богу: Аллилуиа.
Икос 3
Имущии ненависть велию ко иноческому житию, безбожнии потщашася истребити обитель Мгарскую. Обаче никакоже успеша в сем, точию предпослаша к небесным сонм мучеников, яже и по смерти слышат похваления сицевая:
Радуйтеся, безбожия разрушителие; радуйтеся, веры насадителие.
Радуйтеся, обители Мгарския укрепление; радуйтеся, иноков Мгарских крепкое защищение.
Радуйтеся, молящиися за всех, во обитель притекающих; радуйтеся, ходатайствующии о всех, к помощи вашей прибегающих.
Радуйтеся, страстотерпцы преподобнии, Церкве Православныя светлое украшение.
Кондак 4
Буря безбожия, грех ради отцев наших, прииде на землю нашу. Темже мнози от веры отпадоша, обаче малое стадо Христово, аще и гонимо бе, в радости присно пояше Богови: Аллилуиа.
Икос 4
Слышаша людие Христолюбивии подвиги ваша, отцы преподобнии, яко не убоястеся мучений, ниже пламене огненнаго, но вся стреляния демонския презревше и токмо на Единаго Господа упование возложше, мучения препобедили есте. Того ради слышите от всех хваления сицевыя:
Радуйтеся, апостольскою ревностию распалаемии; радуйтеся, со апостолами присно ублажаемии.
Радуйтеся, причастницы ликов девственных; радуйтеся, наследницы обетований Божественных.
Радуйтеся, мучеником в подвизех равнии; радуйтеся, яко исповедники славимии.
Радуйтеся, страстотерпцы преподобнии, Церкве Православныя светлое украшение.
Кондак 5
Боготечным звездам подобни есте, мученицы преподобнии: мо мраце бо жития сияющии, всим верным указуете путь ко спасению, яко да мнози, и еще не ведевшии Христа, истину познают, Богови же воспоют: Аллилуиа.
Икос 5
Видеша безбожников начальницы, яко нисколько успевают во отвращении братии Мгарския от веры спасительныя, потщашася муками иноков устрашити и огненным мучением мужество сокрушити. Обаче братия богомудрыя мучений не убояшася, темже слышат от нас сицевая:
Радуйтеся, муки огня временнаго презревшии; радуйтеся, огня вечнаго радостно избегшии.
Радуйтеся, твердей вере нас научающии; радуйтеся, ко стези спасения наставляющии.
Радуйтеся, кротостию безбожных суровство обличившии; радуйтеся, истинней кротости нас научившии.
Радуйтеся, страстотерпцы преподобнии, Церкве Православныя светлое украшение.
Кондак 6
Проповедницы святости подвигов Ваших быша телеса ваша, мученицы всехвальнии. На нихже вернии со благоговением взираху, и, погребению предавше, ваша страдания воспоминаху, поя Богови: Аллилуиа.
Икос 6
Возсиявый свет Христов в сердцах ваших не угасим пребысть и в годину мучений. В радости бо идосте ко страданию, преславнии, темже и мы похваляем вас:
Радуйтеся, никакоже мраку демонскому причастившиися; радуйтеся, токмо ко Христу светле устремившиися.
Радуйтеся, осветившии путь омраченных; радуйтеся, утвердившии стопы просвещенных.
Радуйтеся, крещения одежды кровию убелившии; радуйтеся, одеяние души мучением украсившии.
Радуйтеся, страстотерпцы преподобнии, Церкве Православныя светлое украшение.
Кондак 7
Хотящим вам преставитися от жития сего, взирали есте со упованием на Христа, подвигоположника. Емуже бо в постризе сочетавшиися, даже и до смерти пребысте вернии, немолчно воспевая: Аллилуиа.
Икос 7
Новое чудо показа Христос, егда молитвами мучеников преподобных обитель Мгарская из пепла возста и новая братия прииде на место подвигов ваших, с любовию поюще вам:
Радуйтеся, обитель вашу молитвами укрепляющии; радуйтеся, иночествующих ко спасению наставляющии.
Радуйтеся, начальников иноков умудряющии; радуйтеся, послушников увеселяющии.
Радуйтеся, новоначальных вразумляющии; радуйтеся, совершенных охраняющии.
Радуйтеся, страстотерпцы преподобнии, Церкве Православныя светлое украшение.
Кондак 8
Странни пребысте в мире сем, отцы преподобнии, сего ради и смерти не убоялися есте, ведуще сию токмо врата быти в Горний Сион, идеже ныне в радости предстоите возлюбленному вами Христу, поюще Ему: Аллилуиа.
Икос 8
Весь род человечь величает подвиги ваша, преподобнии, и вси святии купно радуются, зряще твердость веры вашея. Мы же, грешнии, дерзаем вас воспевати сице:
Радуйтеся, мучения нивочтоже вменившии; радуйтеся, лютость мучителей твердым упованием препобедившии.
Радуйтеся, демонския полки поправшии; радуйтеся, образ терпения христианом даровавшии.
Радуйтеся, веры непорочныя учителие; радуйтеся, любве насадителие.
Радуйтеся, страстотерпцы преподобнии, Церкве Православныя светлое украшение.
Кондак 9
Все естество Ангельское удивися, зря, како человецы во страданиих беша яко безплотнии, и, на земли поживше, никакоже земным прилепишася, токмо едино возлюбльше, еже пети Богови: Аллилуиа.
Икос 9
Ветия безбожных потщашася боголюбивый народ наш отвратити от правыя веры, безбожия же ядом отравити души верных. Обаче преподобнии мученицы Мгарстии, на небесех Богови предстояще, умолиша Его, да дарует и отступльшим паки к Церкви Святей возвратитися. Сего ради воспеваем вси купно:
Радуйтеся, безбожных кротко вразумляющии; радуйтеся, сумнящимся истины веры открывающии.
Радуйтеся, хулителем уста заграждающии; радуйтеся, противников веры в верных обращающии.
Радуйтеся, раскольников во ограду церковную призывающии; радуйтеся, истинной быти едину Церковь провозглашающии.
Радуйтеся, страстотерпцы преподобнии, Церкве Православныя светлое украшение.
Кондак 10
Спасти хотя братию, премудрый игумен Амвросий проси гонителей пощадети иноков; сам же, горяй желанием мученическаго подвига, никогоже от мучения не отврати, обаче всех подвизаше пети Богови: Аллилуиа.
Икос 10
Стена есть девствующим Пресвятая Богородица Дева, и во обителей Мгарстей, яко иногда являше чудотворныя иконы Своя, такожде и в последняя лета показа сонм преподобномучеников, ихже воспеваем тако:
Радуйтеся, чистоте Девою наученнии; радуйтеся, светом Сына Девы просвещеннии.
Радуйтеся, под покровом Богоматере хранимии; радуйтеся, молитве чистей Ею учимии.
Радуйтеся, любовию к Богу Богородицу возвеселившии; радуйтеся, всех к помощи Девы Марии прибегати научившии.
Радуйтеся, страстотерпцы преподобнии, Церкве Православныя светлое украшение.
Кондак 11
Пения молитвенныя приносится вам от всех родов земных, о блаженнии страстотерпцы, и вси вернии, благодаряще Господа, даровавшаго нам сицевых о нас молитвенников, воспевают Христу: Аллилуиа.
Икос 11
Свет подвигов ваших возсия по всей вселенней, отцы преблаженнии. Сего ради мнози и от стран дальних притекают к месту подвигов ваших, да с иноками Мгарскими купно воспоют в радости:
Радуйтеся, к нимже утесненнии прибегают; радуйтеся, ихже молитвами избавление обретают.
Радуйтеся, к нимже веселящиися обращаются; радуйтеся, ижхе предстательством в благоденствии утверждаются.
Радуйтеся, мужем наставницы непрелестнии; радуйтеся, и о женах ходатаи известнии.
Радуйтеся, страстотерпцы преподобнии, Церкве Православныя светлое украшение.
Кондак 12
Благодатию Божиею непреклонни пребысте в мучениих, страстотерпцы преподобнии. И нас тоя благодати сподобите улучити молитвами Вашими, во еже в вере твердо стояти, и радостно воспевати: Аллилуиа.
Икос 12
Поюще ваши подвиги и воспевающе дерзновение ваше, хвалим и величаем Господа, укрепившаго вас и наставившаго, и воздвигшаго в сия последняя лета сицевых нам светильников веры. Сего ради воспеваем мучеником:
Радуйтеся, Богом избраннии; радуйтеся, древним мучеником равнии.
Радуйтеся, Господа крепостию веры возвеселившии; радуйтеся, человеком правило веры явившии.
Радуйтеся, Христовы оружницы непреоборимии; радуйтеся, Церкве столпи непоколебимии.
Радуйтеся, страстотерпцы преподобнии, Церкве Православныя светлое украшение.
Кондак 13
О, преподобнии страстотерпцы обители Мгарския, усерднии ходатаи и молитвенницы за весь мир! Припадающе к вам, молимся, да испросите нам грехов прощение и спасение душ, Церкви благостояние и державе нашей благоденствие, обители Мгарстей процветание и всем верным яже ко спасению прошений исполнение; да вси купно с вами воспоем Подателю земных и Небесных благ: Аллилуиа.
Икос 1
Ангельскаго жития возжелавше, преподобнии, вся красная мира презрели есте, и яко мученицы к горним возшли есте. Темже слышите от нас похваления сицевая:
Радуйтеся, мирских благ вседушевно отрекшиеся; радуйтеся, к небесным любовию Христовой привлекшиеся.
Радуйтеся, горняго мира граждане достопохваляемии; радуйтеся, от всех родов христианских ублажаемии.
Радуйтеся, обетования Христовы во уме присно имевшии; радуйтеся, крилами мучений ко Христу возлетевшии.
Радуйтеся, страстотерпцы преподобнии, Церкве Православныя светлое украшение.
Кондак 1
Взбраннаго Воеводы добльственнии воини, Царю Небесному добре послужившии и веру даже до смерти сохраншии, преподобномученицы обители Мгарския, восхваляем вас, любовию зовуще:
Радуйтеся, страстотерпцы преподобнии, Церкве Православныя светлое украшение.
